KESE info

L-organizzazzjonijiet tas-soċjetà ċivili jinsabu taħt attakk madwar l-Ewropa u l-Amerika. L-UE jeħtiġilha taġixxi minn issa biex tiddefendihom u tissalvagwardja d-demokrazija. Fid-dibattitu plenarju tiegħu fil-Jum Internazzjonali tal-NGOs, il-Kumitat Ekonomiku u Soċjali Ewropew (KESE) kellu messaġġ ċar: l-organizzazzjonijiet tas-soċjetà ċivili huma d-difensuri tad-demokrazija fuq quddiem nett. Bit-tnaqqis ta’ fondi li qed jhedded is-sopravivenza tagħhom, l-UE jeħtiġilha tieħu azzjoni immedjata biex tipproteġihom u tappoġġjahom.

Fis-27 ta’ Frar, il-KESE kellu dibattitu dwar L-UE u s-Soċjetà Ċivili: It-tisħiħ tad-Demokrazija u l-Parteċipazzjoni, li fih ir-rappreżentanti u l-esperti mill-organizzazzjonijiet tas-soċjetà ċivili u l-Membri tal-Parlament Ewropew (MEPs) ingħataw l-opportunità jiddiskutu u jevalwaw ir-rwol tal-organizzazzjonijiet tas-soċjetà ċivili f’dan il-qasam kruċjali

Raquel García Hermida-Van Der Walle, MEP minn Renew Europe, indikat li l-organizzazzjonijiet tas-soċjetà ċivili spiss jikkontribwixxu għall-kontrokontrolli. L-organizzazzjonijiet tas-soċjetà ċivili jipprovdu wkoll metodi differenti ta’ interazzjoni soċjali, li potenzjalment jissostitwixxu s-servizzi tal-gvern li jistgħu jkunu assenti. Minħabba f’hekk, l-organizzazzjonijiet tas-soċjetà ċivili huma l-ewwel li jkunu fil-mira, peress li jistgħu jkunu politikament inkonvenjenti għal ċerti gvernijiet.

Nicholas Aiossa, direttur ta’ Transparency International Europe, qal “hemm kampanja politika orkestrata fil-Parlament Ewropew biex tiskredita, tiddefinanzja u tfixkel ir-rwol u l-funzjoni tal-organizzazzjonijiet tas-soċjetà ċivili. Ma nstabet l-ebda evidenza ta’ irregolaritajiet finanzjarji.”

F’Jannar, il-Partit Popolari Ewropew (PPE) ċentru-lemin tal-Parlament Ewropew akkuża lill-NGOs ambjentali u klimatiċi li ġew iffinanzjati mill-Kummissjoni Ewropea biex jagħmlu lobbying mal-Parlament, ma’ istituzzjonijiet oħra tal-UE u mal-MEPs, u b’hekk qanqlu r-rabja fost l-organizzazzjonijiet tas-soċjetà ċivili tal-Ewropa.

Il-kritika lill-organizzazzjonijiet tas-soċjetà ċivili mhijiex ġdida, iżda l-attakki reċenti ġew amplifikati bl-aħbarijiet foloz u l-miżinformazzjoni. Kif stqarret Brikena Xhomaqi, il-kopresident tal-Grupp ta’ Kuntatt tal-KESE, is-sitwazzjoni hija tbeżbiża biex l-organizzazzjonijiet tas-soċjetà ċivili kollha jingħaqdu flimkien u jagħmlu bidla. “In-nies għandhom ikunu jafu li l-biċċa l-kbira tal-organizzazzjonijiet tas-soċjetà ċivili jiddependu mix-xogħol volontarju, għalhekk mgħandniex nberbqu flus il-kontribwenti.”

Il-parteċipanti appellaw ukoll lill-Kummissjoni Ewropea biex titkellem b’mod aktar qawwi dwar dan is-suġġett, u pproponew għadd ta’ soluzzjonijiet biex jissaħħaħ ir-rwol tal-organizzazzjonijiet tas-soċjetà ċivili.

Is-Sinjura García Hermida-Van Der Walle qalet li se tinsisti biex ir-rwol tal-organizzazzjonijiet tas-soċjetà ċivili jiġi rikonoxxut u msaħħaħ aktar fir-rapport dwar l-istat tad-dritt u fil-mekkaniżmu ta’ kundizzjonalità bħala kundizzjoni abilitanti.

Michał Wawrykiewicz, MEP mill-PPE, qal li l-missjoni tiegħu kienet li jqajjem kuxjenza dwar dawn is-suġġetti fundamentali fil-grupp tiegħu. Punt ieħor li qajjem kien li dawk li jieħdu d-deċiżjonijiet jiġu infurmati li l-organizzazzjonijiet tas-soċjetà ċivili u l-NGOs huma organizzazzjonijiet li joperaw fuq il-post, u jipprovdu servizzi kruċjali li jaffettwaw direttament ħajjet in-nies.

Il-President tal-KESE Oliver Röpke laqa’ l-pożizzjonijiet tar-rappreżentanti tal-organizzazzjonijiet tas-soċjetà ċivili, u ddikjara li: “għandha nirreżistu t-tentattivi li jiddeleġittimizzaw dawn l-organizzazzjonijiet jew joħonqu l-aċċess tagħhom għar-riżorsi essenzjali għall-parteċipazzjoni demokratika. Mir-restrizzjonijiet finanzjarji sal-pressjonijiet politiċi dejjem jiżdiedu, huwa ovvju li l-organizzazzjonijiet tas-soċjetà ċivili għandhom bżonn appoġġ aktar b’saħħtu u aktar prevedibbli biex ikomplu l-ħidma essenzjali tagħhom.” (at)

Aktar minn 800 parteċipant minn organizzazzjonijiet taċ-ċittadini u partijiet ikkonċernati madwar l-Ewropa, inklużi organizzazzjonijiet taż-żgħażagħ, NGOs u ġurnalisti, ingħaqdu mal-Ġimgħa tas-Soċjetà Ċivili, organizzata mill-Kumitat Ekonomiku u Soċjali Ewropew mis-17 sal-20 ta’ Marzu 2025. Is-sessjoni tal-ftuħ enfasizzat il-protezzjoni tal-ispazju ċiviku permezz ta’ azzjoni legali, waqt li affermat mill-ġdid ir-rwol ewlieni tas-soċjetajiet ċivili: obbligu ta’ rendikont għall-karigi ta’ poter, ħolqien ta’ rabtiet, appoġġ għar-reżiljenza soċjali, u vuċi lil dawk li spiss jiġu injorati.

It-tema tal-edizzjoni tal-2025 tal-Ġimgħa tas-Soċjetà Ċivili kienet It-tisħiħ tal-koeżjoni u l-parteċipazzjoni f’soċjetajiet polarizzati. Bit-tliet inizjattivi ewlenin tiegħu, jiġifieri l-panels tal-Gruppi ta’ Kuntatt tal-KESE, l-inizjattiva taċ-ċittadini Ewropej u l-Premju tal-KESE għas-Soċjetà Ċivili, l-avveniment kellu l-għan li:

• jindirizza l-polarizzazzjoni dejjem tikber li ġiet xprunata f’dawn l-aħħar snin mill-impatt tal-kriżi finanzjarja, it-tibdil fil-klima u ż-żieda fl-inugwaljanza fl-introjtu;
• jenfasizza r-rwol ewlieni li s-soċjetà ċivili jista’ jkollha f’dan il-kuntest;
• jinġabru s-soluzzjonijiet u t-talbiet tas-soċjetà ċivili lil dawk li jfasslu l-politika tal-UE sabiex jgħinu fid-depolarizzazzjoni tal-Ewropa permezz tat-tisħiħ tal-koeżjoni tas-soċjetà u l-parteċipazzjoni demokratika f’oqsma ewlenin għas-soċjetà.

Fid-diskors tal-ftuħ tiegħu, il-President tal-KESE Oliver Röpke saħaq li: “Is-soċjetà ċivili għandha tilqa’ l-isfida. Il-parteċipazzjoni, id-djalogu u s-solidarjetà mhumiex biss ideal – huma l-pedament ta’ Ewropa reżiljenti u magħquda. Hekk kif ninsabu miġbura għall-Ġimgħa tas-Soċjetà Ċivili, ejjew naffermaw mill-ġdid l-impenn tagħna għall-inklużjoni u ċ-ċittadinanza attiva. Demokrazija b’saħħitha tiddependi mhux biss mill-istituzzjonijiet, iżda anke mill-involviment tal-poplu kollu tagħha.”

Fid-diskors ewlieni tagħha Albena Azmanova, Professur tax-Xjenza Politika u Soċjali f’City Saint George’s, fl-Università ta’ Londra, tkellmet dwar l-insigurtà ekonomika li qed tikber u li qed jaffaċċjaw il-maġġoranza tan-nies – u li ddeskrivietha bħala “epidemija tal-prekarjetà”. Hija spjegat għaliex is-soċjetà ċivili għandha ċ-ċavetta biex isir avvanz fi żminijiet ta’ insigurtà massiva.

“Għall-biċċa l-kbira tan-nies, l-insigurtà ekonomika massiva xejnet ir-rieda tagħhom li jiġġieldu. Is-soċjetà ċivili għandha r-rieda li tiġġieled. L-attivisti tas-soċjetà ċivili huma xprunati minn sens ta’ skop ikkaratterizzat minn ilmentar speċifiku. Huma l-operaturi viżibbli li jħaddmu d-demokrazija,” qalet.

Kif qal Younous Omarjee, Viċi President tal-Parlament Ewropew, “Aħna neħtieġu soċjetà ċivili li twaħħad liċ-ċittadini, f’dan il-kuntest ta’ individwaliżmu dejjem jikber, u bħala difiża kontra l-ideat tal-lemin estrem li qed jinfirxu.”

Adriana Porowska, Ministru għas-Soċjetà Ċivili, mill-Presidenza Pollakka tal-UE semmiet ir-rwol kruċjali tal-NGOs fir-reżiljenza soċjali u l-appoġġ tagħhom għal gruppi vulnerabbli u maqtugħin, u tkellmet ukoll dwar l-esperjenza Pollakka mas-soċjetà ċivili li tiżgura r-reżiljenza nazzjonali.

Brikena Xhomaqi, kopresident tal-Grupp ta’ Kuntatt tal-KESE man-networks Ewropej tas-soċjetà ċivili, enfasizzat li l-unità fid-diversità, il-mantra tant għal qalb l-UE, titrawwem fil-livell lokali. Madankollu, is-Sinjura Xhomaqi semmiet li l-organizzazzjonijiet tas-soċjetà ċivili u l-NGOs jinsabu taħt attakk, bil-finanzjament u r-rwol tagħhom li qed jiġu kkontestati. “Mingħajr riżorsi, l-organizzazzjonijiet tas-soċjetà ċivili ma jistgħux jiffunzjonaw. Hemm bżonn li l-istituzzjonijiet jipproteġu s-soċjetà ċivili; neħtieġu protezzjoni legali għall-ispazju ċiviku biex inżommu s-soċjetà tagħna flimkien u magħquda fid-diversità.”

Il-Premju ewlieni tal-KESE għas-Soċjetà Ċivili jenfasizza l-kontribut eċċellenti tas-soċjetà ċivili għaż-żamma u t-tisħiħ tal-identità u ċ-ċittadinanza Ewropea. Kull sena, il-premju jkun dedikat għal tema differenti u ta’ importanza urġenti għas-soċjetà b’rabta mal-ħidma tal-KESE.

Fl-20 ta’ Marzu, il-Kumitat Ekonomiku u Soċjali Ewropew (KESE) ippremja tliet organizzazzjonijiet tas-soċjetà ċivili mis-Slovakkja, il-Belġju u Franza, għall-proġetti rivoluzzjonarji tagħhom li jindirizzaw il-livelli dejjem jiżdiedu ta’ polarizzazzjoni dannuża fl-Unjoni Ewropea kollha.

Il-premju ta’ EUR 32 000 inqasam bejn it-tliet rebbieħa.

Il-KESE ta l-ogħla premju ta’ EUR 14 000 lill-Assoċjazzjoni Slovakka tad-Dibattiti għal The Critical Thinking Olympiad, inizjattiva pijuniera li tibni r-reżiljenza għall-miżinformazzjoni fost iż-żgħażagħ Slovakki. Il-proġett jorganizza kompetizzjoni għal studenti fi tliet gruppi ta’ etajiet, li fiha l-istudenti jesperjenzaw sfidi tal-media fid-dinja reali u jivvalutaw il-kontenut għall-affidabbiltà tiegħu.

Iż-żewġ assoċjazzjonijiet l-oħra rċevew EUR 9 000 kull waħda.

L-assoċjazzjoni Reporters d’Espoirs ta’ Franza ġiet it-tieni bil-Prix Européen Jeunes Reporters d’Espoirs tagħha, skema ta’ taħriġ bil-lingwa Franċiża għall-ġurnaliżmu ta’ soluzzjonijiet.

It-tielet premju ngħata lill-FEC Diversité asbl tal-Belġju għall-proġett “ESCAPE GAME EXTREME DROITE pour se désintoxiquer”, logħba immersiva li tiġġieled l-ideoloġiji tal-lemin estrem.

Dwar il-15-il Premju tal-KESE għas-Soċjetà Ċivili

Il-15-il Premju tal-KESE għas-Soċjetà Ċivili tefa’ dawl fuq proġetti mingħajr skop ta’ qligħ immexxija minn individwi, kumpaniji privati u organizzazzjonijiet tas-soċjetà ċivili li għenu fil-ġlieda kontra l-polarizzazzjoni dannuża fl-Unjoni Ewropea kollha.

F’dawn l-aħħar snin, l-Ewropa ntlaqtet minn diversi kriżijiet, mill-gwerra ta’ aggressjoni tar-Russja fl-Ukrajna, iż-żieda fil-prezzijiet tal-enerġija u l-għoli tal-ħajja, u l-konsegwenzi ekonomiċi u soċjali kontinwi ta’ wara l-pandemija tal-COVID-19. Kriżijiet bħal dawn jistgħu jnaqqsu l-fiduċja fl-istituzzjonijiet pubbliċi, u jnisslu polarizzazzjoni dannuża fis-soċjetà kollha.

Waqt li l-polarizzazzjoni tista’ tkun parti minn soċjetà miftuħa u pluralistika, il-populiżmu li qed jiżdied u l-polarizzazzjoni negattiva jirrappreżentaw sfidi sinifikanti għad-demokraziji Ewropej. L-Ewropa qed tiffaċċja wkoll frammentazzjoni kontinwa tax-xenarju tal-media tradizzjonali, miżinformazzjoni li qed tiżdied u attakki fuq il-libertà tal-media, li lkoll joħolqu aktar theddid għall-valuri demokratiċi.

Ir-rebbieħa ta’ din is-sena ntgħażlu minn firxa ġmielha u varjata ta’ aktar minn 50 entrata minn 15-il Stat Membru. Il-proġetti rebbieħa ntgħażlu għall-kreattività l-entużjażmu u d-dedikazzjoni straordinarja tagħhom fil-ġlieda kontra l-polarizzazzjoni dannuża fis-soċjetà Ewropea.

“Is-soċjetà ċivili organizzata taqdi rwol fundamentali fis-salvagwardja tad-demokrazija Ewropea, kif ġie ppruvat għal darb’ oħra mill-proġetti notevoli u vasti ta’ din is-sena” qal il-Viċi President tal-KESE għall-Komunikazzjoni Aurel Laurenţiu Plosceanu.

“Aħna u nfakkru t-tielet anniversarju tal-gwerra ta’ aggressjoni brutali u mhux provokata tar-Russja kontra l-Ukrajna – attakk mhux biss fuq nazzjon sovran iżda fuq il-valuri fundamentali tad-demokrazija, id-dinjità tal-bniedem u l-ordni internazzjonali bbażata fuq ir-regoli – nesprimu solidarjetà mal-poplu Ukren”, qal il-President tal-KESE Oliver Röpke f’dikjarazzjoni maħruġa fis-sessjoni plenarja tal-KESE fi Frar.

Sa mill-ewwel jum ta’ din l-invażjoni, appoġġajna lill-Ukrajna – mhux biss simbolikament, iżda b’azzjoni konkreta. Illum, naffermaw mill-ġdid l-impenn sod tagħna li nappoġġjaw is-sovranità, id-demokrazija u l-futur Ewropew tal-Ukrajna. Nappellaw lill-UE biex issostni u ssaħħaħ l-appoġġ politiku, ekonomiku, umanitarju u militari tagħha.

Il-poplu Ukren wera kuraġġ u reżiljenza straordinarji fid-difiża ta’ pajjiżu u l-prinċipji li jorbtuna flimkien bħala Ewropej. Sa mill-ewwel jum ta’ din l-invażjoni, il-KESE, il-membri tiegħu u s-soċjetà ċivili Ewropea li jirrappreżenta appoġġjaw lill-Ukrajna – mhux biss simbolikament iżda b’azzjoni konkreta.

Fi żmien ta’ inċertezza ġeopolitika li qed tikber, id-dikjarazzjonijiet reċenti mir-rappreżentanti tal-Istati Uniti li jiddubitaw l-impenn kollettiv ta’ difiża tan-NATO huma allarmanti ħafna. L-Ewropa ma tistax tkun kompjaċenti.

L-Ukrajna qed tiġġieled mhux biss għas-sopravivenza tagħha iżda għas-sigurtà tal-kontinent Ewropew kollu.

Il-KESE jħeġġeġ lill-mexxejja tal-UE jaħtfu dan il-mument biex isaħħu l-kapaċitajiet Ewropej ta’ sigurtà u difiża, jiddefinixxu mill-ġdid l-awtonomija strateġika, jiddefendu l-multilateraliżmu u japprofondixxu l-kooperazzjoni man-Nazzjonijiet Uniti, u fl-istess ħin isawru sħubijiet globali aktar b’saħħithom ma’ alleati demokratiċi lil hinn mill-Ewropa.

L-Ewropa trid taġixxi issa.

M’hemmx lok għal indeċiżjoni. L-awtokrati u l-aggressuri jiffjorixxu sforz l-eżitazzjoni tal-oħrajn.

Id-demokraziji jridu jkunu magħquda u sodi.

Il-KESE jistieden lill-UE ssaħħaħ l-awtonomija strateġika tagħha, tiddefendi kemm id-demokrazija kif ukoll id-drittijiet fundamentali, u tappoġġja b’determinazzjoni lill-Ukrajna. Issa wasal iż-żmien biex l-UE tieħu azzjoni ġeopolitika strateġika.

Tista’ taqra l-istqarrija għall-istampa hawnhekk. (at)

Il-kompitu ewlieni tal-Presidenza Pollakka attwali tal-Kunsill tal-Unjoni Ewropea se jkun li l-Ewropa tinżamm magħquda, jintlaħaq progress u jittieħdu deċiżjonijiet rapidi

Fis-sessjoni plenarja ta’ Frar, il-Kumitat Ekonomiku u Soċjali Ewropew kellu dibattitu dwar il-prijoritajiet tal-Presidenza Pollakka tal-UE ma’ Magdalena Sobkowiak-Czarnecka, Sottosegretarju tal-Istat tal-Polonja għall-Affarijiet tal-Unjoni Ewropea.

B’referenza għas-sigurtà esterna tal-UE u, b’mod partikolari, għall-gwerra ta’ aggressjoni kontra l-Ukrajna, is-Sinjura Sobkowiak-Czarnecka qalet li: “l-objettiv tagħna huwa li nżommu l-Ukrajna għaddejja u nżommu l-għaqda ġewwa l-Ewropa.” Hija semmiet is-16-il pakkett ta’ sanzjonijiet kontra r-Russja bħala waħda mill-ewwel kisbiet tal-Presidenza Pollakka.

Il-President tal-KESE, Oliver Röpke, enfasizza li l-Polonja kienet qed tieħu f’idejha l-Presidenza b’rotazzjoni tal-UE fi żmien mifni minn sfidi diffiċli bħat-tensjonijiet ġeopolitiċi u l-kriżijiet tal-enerġija.

Huwa żied jgħid li “d-dibattitu tal-lum afferma mill-ġdid l-importanza kritika tal-istabbiltà, ir-reżiljenza u l-għaqda biex insawru l-futur tal-Unjoni Ewropea. Il-prijoritajiet tal-Presidenza Pollakka jallinjaw mill-qrib mal-ambizzjonijiet kollettivi tagħna, b’mod partikolari fit-trawwim ta’ approċċ multidimensjonali għas-sigurtà. Fi żmien ta’ inċertezza globali, l-impenn tagħna għal azzjoni deċiżiva u kooperattiva jibqa’ sod.”

Bis-slogan “Sigurtà, Ewropa!”, il-Presidenza Pollakka tal-UE se taħdem fuq seba’ dimensjonijiet tas-sigurtà – affarijiet esterni, affarijiet interni, ekonomija, ikel, enerġija, saħħa u informazzjoni.

F’dawn l-aħħar xhur, il-kooperazzjoni bejn il-Kumitat u l-Presidenza Pollakka kienet b’saħħitha u produttiva. Il-KESE fassal 15-il Opinjoni esploratorja, li diġà ġew adottati jew se jiġu adottati dalwaqt. (mp)

Iffaċċjata b’theddid għas-sigurtà li qed jiżdied, l-Ewropa teħtieġ b’mod urġenti strateġija unifikata ta’ finanzjament għad-difiża. Bi tweġiba għal talba mill-Presidenza Pollakka tal-UE li jmiss, il-KESE adotta Opinjoni li tappella għal azzjoni kuraġġuża: aktar investiment f’sistemi moderni, kooperazzjoni approfondita man-NATO, u finanzjament akbar fi ħdan il-qafas finanzjarju tal-UE.

Ir-riskji għas-sigurtà tal-Ewropa qed jiżdiedu, u dan jesponi d-dipendenza tagħha fuq fornituri esterni tad-difiża – 78 % tal-EUR 75 biljun minfuqa mill-pajjiżi tal-UE fuq l-akkwist tad-difiża fuq perjodu ta’ sena marru għand fornituri mhux tal-UE. It-tisħiħ tal-bażi industrijali u teknoloġika tad-difiża Ewropea (EDTIB) huwa kruċjali biex titnaqqas din id-dipendenza.

“Il-mekkaniżmi ta’ finanzjament tad-difiża tal-UE jridu jiġu riveduti biex jiġu indirizzati l-isfidi kontemporanji,” jispjega r-relatur tal-Opinjoni tal-KESE dwar Il-Finanzjament għad-Difiża fl-UE, Marcin Nowacki. “Ir-regoli baġitarji eżistenti jillimitaw l-infiq militari, u waqt li inizjattivi bħall-Fond Ewropew għad-Difiża (EDF) u l-Faċilità Ewropea għall-Paċi (EPF) jirrappreżentaw il-progress, dawn għadhom insuffiċjenti biex jindirizzaw l-iskala tat-theddid attwali.”

Il-kooperazzjoni tan-NATO hija essenzjali għall-interoperabbiltà u għal strateġija unifikata. L-akkwist konġunt, is-sħubijiet taċ-ċibersigurtà u tas-sigurtà spazjali, u l-proġett satellitari IRIS2 ser isaħħu r-reżiljenza. Il-finanzjament għad-difiża jrid ikun allinjat mal-prijoritajiet usa’ tal-UE mingħajr ma jikkomprometti l-għanijiet soċjali u ambjentali. L-investiment strateġiku, l-innovazzjoni u l-ippjanar fit-tul huma kruċjali biex jiġu żgurati s-sigurtà u l-awtonomija tal-Ewropa. (tk)

Il-Kumitat Ekonomiku u Soċjali Ewropew (KESE) organizza Forum ta’ Livell Għoli dwar id-Drittijiet tan-Nisa, li laqqa’ flimkien ilħna ewlenin biex jiġu indirizzati kwistjonijiet urġenti dwar id-drittijiet tan-nisa u jiddeskrivi l-prijoritajiet ewlenin qabel is-sessjoni li jmiss tal-Kummissjoni tan-Nazzjonijiet Uniti dwar l-Istatus tan-Nisa.

Il-messaġġ tal-Forum ta’ Livell Għoli tal-KESE dwar id-Drittijiet tan-Nisa kien ċar: progress sar, iżda dan mhuwiex biżżejjed. Minkejja li l-UE ħadet passi biex tipproteġi lin-nisa u l-bniet, il-forom strutturali ta’ inugwaljanza, l-istereotipi tal-ġeneri u r-rigressi kontra d-drittijiet tan-nisa għadhom jheddu l-kisbiet li nkisbu b’diffikultà fl-Ewropa. Sakemm jippersistu l-ostakli strutturali, il-parteċipazzjoni sħiħa tan-nisa fis-soċjetà se tkun limitata.

Il-Forum ta’ livell għoli, li sar fis-26 ta’ Frar matul is-sessjoni plenarja tal-KESE, laqqa’ flimkien il-President tal-Grupp Ad hoc tal-KESE dwar l-Ugwaljanza, Sif Holst, il-President tal-KESE Oliver Röpke, u l-Kummissarju Ewropew għall-Ugwaljanza kif ukoll għall-Preparatezza u għall-Ġestjoni tal-Kriżijiet, Hadja Lahbib, kif ukoll Carlien Scheele (Direttur tal-Istitut Ewropew għall-Ugwaljanza bejn il-Ġeneri), Florence Raes (Direttur tal-uffiċċju fi Brussell għan-Nisa tan-NU), Ayşe Yürekli (Rappreżentant tal-UE f’KAGIDER – Imprendituri Nisa tat-Turkija), Mary Collins (Segretarju Ġenerali tal-Lobby Ewropew tan-Nisa) u Cianán Russell (Uffiċjal Għoli tal-Politika f’ILGA Europe).

Il-Forum kien fih żewġ panels dinamiċi li jindirizzaw sfidi urġenti għall-ugwaljanza bejn il-ġeneri, kull wieħed marbut ma’ Opinjonijiet ewlenin tal-KESE adottati matul is-sessjoni. L-esperti, l-avukati u dawk li jfasslu l-politika ngħaqdu flimkien biex jaqsmu l-għarfien, jipproponu soluzzjonijiet u jsaħħu l-impenji biex javvanzaw id-drittijiet tan-nisa fl-Ewropa u lil hinn minnha.

L-ewwel panel iffoka fuq id-69 sessjoni li jmiss tal-Kummissjoni tan-NU dwar l-Istatus tan-Nisa (UNCSW69) waqt li t-tieni panel iffoka fuq il-vjolenza kontra n-nisa u l-bniet bħala kwistjoni tad-drittijiet tal-bniedem. Ġew adottati wkoll fil-plenarja wara l-forum żewġ Opinjonijiet relatati: Il-kontribut tal-KESE għall-prijoritajiet tal-UE fid-69 sessjoni tal-Kummissjoni tan-NU dwar l-Istatus tan-Nisa u Il-vjolenza kontra n-nisa bħala kwistjoni tad-drittijiet tal-bniedem: is-sitwazzjoni attwali tal-miżuri fl-UE kollha. (lm)

Fl-okkażjoni tad-69 sessjoni tal-Kummissjoni tan-Nazzjonijiet Uniti dwar l-Istatus tan-Nisa (CSW69) fi New York, il-Kumitat Ekonomiku u Soċjali Ewropew (KESE) u l-Kunsill Ekonomiku, Soċjali u Kulturali tal-Unjoni Afrikana (ECOSOCC tal-UA) affermaw mill-ġdid l-impenn sod tagħhom biex javvanzaw l-ugwaljanza bejn il-ġeneri u l-emanċipazzjoni tan-nisa.

Hekk kif il-komunità internazzjonali qed tfakkar it-30 sena mill-adozzjoni tad-Dikjarazzjoni ta’ Beijing u l-Pjattaforma għal Azzjoni, il-KESE u l-ECOSOCC tal-UA jirrikonoxxu kemm il-progress miksub kif ukoll l-isfidi attwali li għadhom ixekklu l-ugwaljanza sħiħa bejn il-ġeneri.

It-tieni dikjarazzjoni konġunta tagħhom tenfasizza l-prijoritajiet ewlenin, inkluża ż-żieda fit-tmexxija min-nisa permezz tal-kwoti tal-ġeneru, it-tmiem tal-vjolenza abbażi tal-ġeneru permezz ta’ konvenzjonijiet internazzjonali, it-tnaqqis tad-distakk diġitali bejn il-ġeneri, u l-promozzjoni tal-emanċipazzjoni ekonomika tan-nisa.

Id-dikjarazzjoni tħeġġeġ politiki aktar b’saħħithom dwar ix-xogħol ta’ kura mhux imħallas, l-inklużjoni tan-nisa fl-isforzi għall-paċi, u t-tfassil tal-politika mmexxi mid-data. Jenfasizza wkoll il-kooperazzjoni globali biex jitneħħew l-inugwaljanzi sistemiċi u jiġu rispettati d-drittijiet tan-nisa. Il-KESE jistieden ukoll lill-UE tiġġieled il-vjolenza abbażi tal-ġeneru, tiżgura l-ugwaljanza bejn il-ġeneri, u tiddefendi r-rwol tas-soċjetà ċivili fl-avvanz tal-ugwaljanza.

Il-President tal-KESE Oliver Röpke qal: “Hekk kif qed infakkru t-30 sena mid-Dikjarazzjoni ta’ Beijing, jeħtiġilna ngħaddu mill-kliem għall-fatti”. L-ugwaljanza bejn il-ġeneri mhijiex privileġġ iżda dritt fundamentali, u l-kisba tagħha hija kritika għal soċjetajiet sostenibbli u inklużivi. Il-KESE jibqa’ sod fl-impenn tiegħu li jxejjen l-ostakli, jiżgura l-parteċipazzjoni sħiħa tan-nisa fit-teħid tad-deċiżjonijiet u jrawwem l-emanċipazzjoni ekonomika. Wasal iż-żmien li l-gvernijiet, l-istituzzjonijiet u s-soċjetà ċivili jaġixxu b’mod deċiżiv – l-ugwaljanza ma tinkisibx mingħajr responsabbiltà.”

Il-Kummissjoni dwar l-Istatus tan-Nisa hija l-korp internazzjonali u intergovernattiv ewlieni li jiġġieled għall-ugwaljanza bejn il-ġeneri. Din kienet it-tieni darba li l-KESE ħa sehem fl-akbar laqgħa annwali tan-NU dwar l-emanċipazzjoni tan-nisa. (tk)

Il-Kumitat Ekonomiku u Soċjali Ewropew (KESE) qed iħeġġeġ lill-UE timplimenta strateġija industrijali robusta li ssaħħaħ il-kompetittività, toħloq impjiegi ta’ kwalità u tallinja mal-Patt Ekoloġiku. Biex tirnexxi, din l-istrateġija trid tiġi mmonitorjata mill-qrib u adattata għall-isfidi emerġenti.

“L-Ewropa qed taffaċċja riskju serju ta’ deindustrijalizzazzjoni. L-industrija u l-azzjoni klimatika jridu jimxu id f’id,” qal Andrea Mone, relatur tal-Opinjoni tal-KESE dwar Il-futur tal-industrija tal-UE quddiem il-prezzijiet għoljin tal-enerġija u l-ispejjeż tat-tranżizzjoni, adottata fis-sessjoni plenarja ta’ Frar.

Fl-Opinjoni, il-KESE enfasizza l-ħtieġa għal qafas ekonomiku u regolatorju b’saħħtu biex jiġu indirizzati l-kostijiet għoljin tal-enerġija u tal-materja prima, l-isfidi tal-investiment fit-tranżizzjoni ekoloġika, id-diskrepanzi fl-infrastruttura, in-nuqqas ta’ ħiliet u d-domanda interna dgħajfa. Politika tal-kompetizzjoni ffukata fuq l-investiment u l-innovazzjoni hija kruċjali biex trawwem il-koeżjoni soċjali u territorjali.

L-appell l-KESE għal azzjoni urġenti qed isir fi żmien ta’ tħassib dejjem jikber rigward is-sigurtà ekonomika tal-Ewropa u d-dipendenzi esterni tagħha.  F’era ta’ tali inċertezzi ġeopolitiċi u kummerċjali dejjem akbar, hija meħtieġa politika kummerċjali tal-UE reżiljenti biex tissalvagwardja s-sostenibbiltà industrijali f’ċirkostanzi ta’ għanijiet ta’ dekarbonizzazzjoni asimmetriċi, kapaċità żejda globali, u tensjonijiet kummerċjali li qed jiżdiedu. Biex jintlaħaq dan l-għan hija essenzjali awtonomija akbar fl-iżgurar ta’ materja prima kritika.

Iż-żieda fl-investiment, kif enfasizzat fir-rapport ta’ Draghi, u r-riformi tal-governanza huma kruċjali. Suq uniku unifikat, b’mod partikolari fl-enerġija, se jsaħħaħ l-ekonomija tal-UE. It-tnaqqis tal-piżijiet regolatorji, l-irfinar tal-oqfsa tas-suq tal-elettriku u t-titjib tal-għodod finanzjarji bħall-ftehimiet dwar ix-xiri tal-enerġija se jwieżnu t-tranżizzjonijiet tal-industrija.

Tranżizzjoni ġusta titlob djalogu soċjali b’saħħtu u negozjar kollettiv. Il-politika industrijali trid tallinja mal-istrateġiji tal-edukazzjoni u tal-forza tax-xogħol, b’enfasi fuq ir-riċerka, l-innovazzjoni u l-bini tal-ħiliet. L-investiment fl-infrastruttura tal-enerġija, l-enerġija rinnovabbli u l-inizjattivi tal-ekonomija ċirkolari se jgħin biex jintlaħqu l-għanijiet klimatiċi.

Il-KESE adotta wkoll Opinjoni supplimentari dwar Il-futur tal-industriji tal‑UE li jużaw ħafna riżorsi u enerġija, li tipproponi soluzzjonijiet imfassla apposta biex jiżguratw is-sostenibbiltà fit-tul tagħhom. L-indirizzar tal-isfidi speċifiċi li jaffaċċjaw huwa kruċjali għall-futur industrijali tal-UE. (ll)

L-espansjoni transfruntiera fi ħdan l-UE tinvolvi n-navigazzjoni ta’ labirint ta’ regoli u burokrazija tal-VAT konfliġġenti li jżidu l-ispejjeż. L-intrapriżi żgħar u ta’ daqs medju (SMEs) iħabbtu wiċċhom ma’ piżijiet ta’ konformità sproporzjonati, li jagħmluha aktar diffiċli biex jespandu u jikkompetu. Il-KESE jappella għal riformi urġenti f’żewġ Opinjonijiet adottati matul il-plenarja tiegħu ta’ Frar, li jibnu fuq ir-rapporti ta’ Letta u Draghi. Il-proposti jinkludu l-armonizzazzjoni tar-regolamenti finanzjarji, ir-rappurtar ibbażat fuq l-IA u politika industrijali kkoordinata.

“Is-suq uniku huwa s-sinsla tal-prosperità ekonomika Ewropea, iżda għadu mhux komplut f’oqsma ewlenin bħall-finanzi, l-enerġija u s-servizzi diġitali,” qal il-President tal-KESE Oliver Röpke. “Fid-dibattitu tal-lum, saret enfasi fuq il-ħtieġa urġenti għal riformi biex jitneħħew l-ostakli u jissaħħaħ is-settur tas-servizzi, waqt li jiġu żgurati kundizzjonijiet ekwi għan-negozji fl-UE kollha”.

Maria Luís Albuquerque, Kummissarju għas-Servizzi Finanzjarji u għall-Unjoni tat-Tfaddil u tal-Investimenti, appoġġjat din is-sejħa: “Il-viżjoni tiegħi għall-Unjoni tat-Tfaddil u tal-Investimenti hija li noħolqu l-ġid għaċ-ċittadini u t-tkabbir għall-kumpaniji tagħna billi niġbruhom flimkien f’ambjent sikur, kompetittiv, regolat u ssorveljat tajjeb.”

L-Opinjonijiet tal-KESE identifikaw żewġ sfidi kritiċi għall-kompetittività: il-frammentazzjoni fis-suq uniku, enfasizzata fir-rapporti Letta u Draghi u l-burokrazija eċċessiva li b’mod partikolari hija piż fuq l-SMEs. Dawn iż-żewġ fatturi joħonqu l-innovazzjoni u t-tkabbir ekonomiku.

X’inhi l-problema?

In-negozji fl-Ewropa huma mxekkla mill-kumplessità u d-duplikazzjoni ta’ regolamenti. Dan iwassal għal ħela ta’ ħin u flus, inaqqas ir-ritmu tal-Patt Ekoloġiku u jirrestrinġi l-aċċess għall-finanzjament għall-kumpaniji ta’ daqs medju. Dan jirriżulta f’negozji frustrati, spejjeż ogħla għall-konsumatur u tkabbir ekonomiku aktar dgħajjef.

Lil hinn mill-piżijiet regolatorji, l-Ewropa qed tħabbat wiċċha ma’ sfidi strutturali aktar profondi li jheddu l-kompetittività tagħha. Il-progress kajman fit-tlestija tas-suq uniku, id-disparitajiet fl-infrastruttura diġitali u tal-enerġija, u n-nuqqas ta’ politika industrijali koordinata qed jillimitaw il-kapaċità tal-UE li tikkompeti fuq livell dinji. Waqt li blokok ekonomiċi oħra qed jaġixxu malajr biex jattiraw l-investiment u jrawmu l-innovazzjoni, l-Ewropa qed tirriskja li taqa’ lura.

X’jista’ jsir?

It-tisħiħ tal-kompetittività jirrikjedi approċċ komprensiv, li jinkludi t-tneħħija tal-ostakli f’setturi ewlenin bħall-finanzi u l-enerġija, l-aċċellerazzjoni tat-trasformazzjoni diġitali u l-iżgurar li l-SMEs ikunu jistgħu jespandu u jikkompetu b’kundizzjonijiet ekwi.

L-Opinjonijiet tal-KESE jipproponu:

• Is-semplifikazzjoni tar-regolamenti mingħajr ma jitbaxxew l-istandards ambjentali u soċjali.
• Il-ħolqien ta’ pjattaforma unika bbażata fuq l-IA biex tissemplifika r-rapportar għall-SMEs u għall-kumpaniji ta’ daqs medju, u b’hekk tħaffef il-konformità.
• L-armonizzazzjoni tar-regoli fis-setturi kollha biex jitnaqqas ix-xogħol amministrattiv ripetittiv.
• L-istandardizzazzjoni tar-regolamenti finanzjarji fl-Istati Membri kollha b’politika industrijali koordinata tal-UE.
• Ir-riforma tal-Mekkaniżmu ta’ Aġġustament tal-Karbonju fil-Fruntieri (CBAM) għal sistema aktar ġusta u inqas ta’ piż. (gb)

Fis-6 ta’ Marzu, il-KESE ospita dibattitu dwar il-Patt għal Industrija Nadifa tal-Kummissjoni Ewropea, jiem biss qabel id-diskussjonijiet tal-Kunsill tat-12 ta’ Marzu. Dawk li jfasslu l-politika, il-mexxejja tal-industrija u s-soċjetà ċivili eżaminaw jekk il-pjan jistax verament jappoġġja s-settur tat-teknoloġija nadifa, l-industriji intensivi fl-enerġija u l-awtonomija strateġika tal-Ewropa.

Bl-instabbiltà ġeopolitika u l-bidla fir-relazzjonijiet transatlantiċi, il-ħtieġa tal-Ewropa għal awtonomija strateġika hija aktar urġenti minn qatt qabel. Il-Patt għal Industrija Nadifa għandu l-għan li jaċċellera d-dekarbonizzazzjoni u ċ-ċirkolarità, waqt li jagħti spinta lill-kompetittività industrijali, billi jibda mit-tnaqqis tal-prezzijiet tal-enerġija. Għad fadal mistoqsijiet dwar il-fattibbiltà u l-finanzjament tiegħu.

“Il-kwistjoni mhijiex li wieħed jagħżel bejn l-awtonomija strateġika, il-kompetittività jew it-tranżizzjoni doppja. Is-setturi industrijali kollha huma kkonċernati u jeħtiġilhom jadattaw, bil-pass tagħhom iżda b’impenji ċari,” qal Pietro de Lotto, il-President tal-Kummissjoni Konsultattiva dwar il-Bidliet Industrijali (CCMI) tal-KESE, waqt li ddeskriva l-isfida bħala att ta’ bbilanċjar.

Il-Kummissjoni enfasizzat il-ħtieġa ġeopolitika li nsiru indipendenti mill-enerġija mir-Russja, iżda t-tnaqqis industrijali tal-Ewropa huwa tħassib dejjem akbar. Il-produzzjoni industrijali u l-influssi ta’ investiment dirett barrani t-tnejn naqsu b’mod sinifikanti f’dawn l-aħħar sentejn.

Il-finanzjament se jkun sfida ewlenija. Il-kisba tal-objettivi tal-pjan tirrikjedi kooperazzjoni bejn l-istituzzjonijiet tal-UE, l-Istati Membri u l-industrija. Waqt li l-Bank Ewropew tal-Investiment wiegħed EUR 500 miljun f’kontrogaranziji u EUR 1,5 biljun biex itejbu l-grilji tal-enerġija, il-gvernijiet nazzjonali jeħtiġilhom jimmobilizzaw riżorsi addizzjonali.

L-impatt soċjali tat-tranżizzjoni huwa wkoll kwistjoni ewlenija, b’mod partikolari fl-industriji intensivi fl-enerġija li ġarrbu telf sinifikanti ta’ impjiegi. Ir-rappreżentanti tas-soċjetà ċivili staqsew jekk it-tnaqqis tat-taxxi fuq l-enerġija, proposta ewlenija tal-Patt, jistax isir askapitu tal-finanzjament tal-edukazzjoni u tal-kura tas-saħħa.

Minkejja l-ottimiżmu dwar l-għanijiet fit-tul tal-Patt għal Industrija Nadifa, l-esperti wrew tħassib dwar il-kapaċità tiegħu li jindirizza l-isfidi fuq terminu qasir. Il-ħeffa u s-semplifikazzjoni huma kruċjali, peress li l-kostijiet għoljin tal-enerġija u l-ostakli regolatorji jistgħu jnaqqsu r-ritmu tal-progress. Il-politiki nazzjonali frammentati għadhom sfida, u l-Patt għal Industrija Nadifa qed fil-periklu li jitlef opportunità kruċjali biex il-politika industrijali tiġi allinjata fl-Ewropa kollha.

In-newtralità teknoloġika hija preokkupazzjoni wkoll, b’dibattitu dwar il-bilanċ it-tajjeb tas-sorsi ta’ enerġija rinnovabbli, tal-idroġenu u tal-bijofjuwils. Waqt li l-enfasi fuq l-enerġija rinnovabbli tintlaqa’ tajjeb, huma meħtieġa impenji b’saħħithom għall-effiċjenza enerġetika. Bl-enerġija rinnovabbli l-konsumaturi Ewropej diġà ffrankaw EUR 100 biljun bejn l-2021 u l-2023, suċċess li l-UE għandha tibni fuqu. (jh)

Il-bdiewa Ewropej jiffaċċjaw kriżijiet dejjem akbar, minn temp estrem sa instabbiltà tas-suq u kompetizzjoni inġusta. Il-Kumitat Ekonomiku u Soċjali Ewropew (KESE) iwissi li l-politiki attwali tal-UE jonqsu milli jipproteġu lill-bdiewa u jappella għal riformi urġenti biex jiġi żgurat id-dħul, tissaħħaħ is-setgħa tan-negozjar u tiġi żgurata agrikoltura sostenibbli.

F’Opinjoni mitluba mill-Presidenza Pollakka tal-UE, il-KESE appella għal sistema agrikola aktar reżiljenti, li tqiegħed lill-bdiewa fil-qalba tagħha.

“Il-biedja hija professjoni nobbli b’żewġ objettivi ewlenin: il-produzzjoni ta’ ikel sikur tal-ogħla kwalità għall-konsum mill-bniedem u ż-żamma u t-titjib tal-ambjent. Kulma nitolbu għal dan huwa paga onesta għal jum ta’ xogħol ġenwin u rispett u prezz ġust għall-ikel li nipprovdu,” qal Joe Healy, wieħed mit-tliet relaturi tal-Opinjoni.

Skont il-KESE, il-Politika Agrikola Komuni (PAK) mhijiex mgħammra biżżejjed biex tindirizza l-isfidi tal-lum. L-għodod finanzjarji li tirrakkomanda biex jiġu appoġġjati l-bdiewa jinkludu assigurazzjoni pubblika kontra d-diżastri naturali, għajnuna kontroċiklika u pagamenti diretti. Il-fondi mutwi, li diġà jintużaw f’ċerti pajjiżi tal-UE, jistgħu jipprovdu xibka ta’ sikurezza addizzjonali, iffinanzjata b’mod kollettiv mill-bdiewa, l-industrija, il-gvernijiet reġjonali u l-UE.

Peress li hija ppjanata reviżjoni tal-PAK wara l-2027, il-KESE rrakkomanda li l-baġit tagħha jerġa’ lura għal mill-inqas 0,5 % tal-PDG tal-UE. Huma meħtieġa regolamenti kummerċjali aktar stretti biex jiġi żgurat li l-prodotti importati jissodisfaw l-istandards ambjentali u tax-xogħol tal-UE.

Tħassib ewlieni ieħor huwa l-bejgħ bi prezzijiet orħos mill-kost, prattika li tpoġġi lill-bdiewa taħt pressjoni finanzjarja estrema. Il-KESE qed iħeġġeġ lil dawk li jfasslu l-politika tal-UE biex, abbażi tal-liġijiet dwar il-katina alimentari ta’ Spanja bħala mudell, jikkunsidraw bis-serjetà l-projbizzjoni ta’ xiri bi prezzijiet orħos mill-kost biex jiġi evitat li bejjiegħa bl-imnut kbar jimbuttaw lill-bdiewa barra mis-suq.

Sabiex jittejbu t-trasparenza u s-saħħa fis-suq tal-bdiewa, il-KESE ppropona ċentru diġitali tal-UE għall-monitoraġġ tal-prezzijiet, l-ispejjeż u l-profitti. Huwa rrakkomanda wkoll negozjati kollettivi dwar il-prezzijiet u aktar appoġġ għall-kooperattivi u l-organizzazzjonijiet tal-produtturi. Hemm bżonn ta’ aktar indipendenza ekonomika u kompetittività fis-settur tal-agrikoltura tal-UE.

Għalkemm l-għanijiet klimatiċi huma essenzjali, il-bdiewa ma jistgħux iġarrbu l-kostijiet waħedhom. Fond għas-sostenibbiltà jista’ jgħinhom fit-tranżizzjoni lejn prattiki aktar ekoloġiċi. L-Opinjoni wissiet dwar ir-riskju ta’ rilokazzjoni tal-emissjonijiet tal-karbonju, peress li r-regoli stretti tal-UE jpoġġu lill-bdiewa lokali fi żvantaġġ meta mqabbla ma’ kompetituri mhux tal-UE.

Il-KESE enfasizza l-importanza tal-investiment fl-iżvilupp rurali, l-innovazzjoni u regoli tal-PAK aktar sempliċi. Peress li l-bdiewa jinsabu taħt pressjoni dejjem akbar, l-urġenza hija ċara: il-mexxejja tal-UE jridu jaġixxu qabel ma jisparixxu aktar azjendi agrikoli. (ks)

Il-Kumitat Ekonomiku u Soċjali Ewropew (KESE) ħareġ rakkomandazzjonijiet ewlenin dwar is-Semestru Ewropew 2025 – Pakkett tal-Ħarifa, li jħeġġu investimenti strateġiċi u kooperazzjoni aktar b’saħħitha biex jissaħħu r-reżiljenza u l-kompetittività tal-UE.

Il-KESE ressaq ir-rakkomandazzjonijiet tiegħu f’Opinjoni adottata fis-sessjoni plenarja tiegħu fi Frar, fejn għamel enfasi fuq is-sostenibbiltà, ir-riformi tas-suq tax-xogħol u allinjament aħjar bejn il-politiki nazzjonali u tal-UE, waqt li appella għal involviment akbar tas-soċjetà ċivili.

Il-KESE ddispjaċih għan-nuqqas tal-Istħarriġ Annwali dwar it-Tkabbir Sostenibbli, dokument ta’ politika kruċjali. Huwa enfasizza l-ħtieġa li l-istituzzjonijiet tal-UE jħejju għar-riskji ġeopolitiċi li jaffettwaw il-kummerċ, l-inflazzjoni u t-tkabbir.

Il-KESE ta l-appoġġ tiegħu għall-inizjattiva Boxxla għall-Kompetittività u appella għal investimenti fis-setturi tal-enerġija u diġitali, inkluż Fond Ewropew għall-Investimenti Strateġiċi. Barra minn hekk, appella għal parteċipazzjoni aktar b’saħħitha tas-soċjetà ċivili, rieżami prammatiku tal-Faċilità għall-Irkupru u r-Reżiljenza (RRF), u kooperazzjoni msaħħa tal-Istati Membri biex jittejbu l-politiki ekonomiċi u l-produttività. (tk)

Il-politika ta’ koeżjoni ilha pilastru tal-integrazzjoni Ewropea, u tippromovi l-unità ekonomika, soċjali u ġeografika madwar l-UE. Hekk kif qed jissawwar il-Qafas Finanzjarju Pluriennali (QFP) ta’ wara l-2027, huwa essenzjali li tiġi modernizzata l-politika ta’ koeżjoni biex jiżdiedu l-effiċjenza, is-sostenibbiltà u r-rispons għal sfidi ġodda.

Fl-Opinjoni tiegħu adottata reċentement dwar It-tisħiħ tal-orjentazzjoni lejn ir-riżultati tal-politika ta’ koeżjoni wara l-2027, il-KESE enfasizza l-ħtieġa li jittieħed approċċ orjentat lejn ir-riżultati biex jiġi żgurat li l-politika ta’ koeżjoni tkompli tipprovdi benefiċċji tanġibbli waqt li tnaqqas l-inugwaljanzi u tippromovi l-kompetittività sostenibbli.

“Il-politika ta’ koeżjoni għandha tibqa’ l-istrument ewlieni tal-UE għall-iżvilupp reġjonali. Approċċ orjentat lejn ir-riżultati jiżgura li kull euro li jintefaq jikkontribwixxi għall-benesseri ekonomiku u soċjali,” qal ir-relatur għall-Opinjoni, David Sventek.

Il-QFP 2028+ se jeħtieġ bidla radikali biex jappoġġja l-iżvilupp reġjonali, it-tranżizzjoni ekoloġika u diġitali, u l-kompetittività ekonomika. Bi ħtiġijiet ta’ investiment li jaqbżu EUR 750-800 biljun fis-sena, huwa essenzjali li jkun hemm finanzjament b’saħħtu mill-UE.

Il-KESE jitlob li l-kapaċità fiskali tinżamm għal 1.8% tal-PDG tal-UE u li jiżdied il-finanzjament tal-politika ta’ koeżjoni. Il-prijoritajiet ewlenin jinkludu governanza kondiviża, politiki reġjonali mfassla apposta, finanzjament ibbażat fuq ir-riżultati, u proċessi simplifikati.

Approċċ immexxi mir-riżultati jsaħħaħ l-effiċjenza iżda jeħtieġ implimentazzjoni u sorveljanza aħjar. L-ibbilanċjar tal-kompetittività mal-investiment soċjali, it-tisħiħ tal-appoġġ tekniku, u l-iżgurar tat-trasparenza se jfissru li l-politika ta’ koeżjoni tħalli impatt ikbar, kif ukoll irawmu r-reżiljenza ekonomika u jnaqqsu d-disparitajiet madwar l-Ewropa. (tk)

It-turiżmu huwa mutur għall-ekonomija tal-UE u jista’ jsaħħaħ il-kompetittività tal-Ewropa. Wasal iż-żmien li nikkunsidraw mill-ġdid il-mod kif jaħdem it-turiżmu u nimxu lil hinn mis-sostenibbiltà lejn turiżmu riġenerattiv – fejn id-destinazzjonijiet mhux biss jissopravivu iżda jirnexxu.

Il-Kumitat Ekonomiku u Soċjali Ewropew (KESE) qed iħeġġeġ lill-Unjoni Ewropea tittrasforma s-settur tat-turiżmu tagħha, u tenfasizza s-sostenibbiltà u r-riġenerazzjoni biex jiġu żgurati benefiċċji ekonomiċi u ambjentali fit-tul.

Hekk kif it-turiżmu jibqa’ pilastru importanti għall-ekonomija tal-UE, b’mod partikolari fir-reġjuni li jiddependu ħafna mill-industrija, il-KESE qiegħed jappoġġja tranżizzjoni aċċellerata lejn it-turiżmu sostenibbli u ċaqliqa lejn strateġiji għal turiżmu riġenerattiv, kif deskritt fl-Opinjoni tiegħu dwar It-turiżmu fl-UE: is-sostenibbiltà bħala xprun għall-kompetittività fit-tul.

“Irridu niżguraw li t-turiżmu jkollu rwol fir-rilanċ tal-kompetittività Ewropea. Dan huwa essenzjali, peress li t-turiżmu huwa parti tant importanti mill-PDG ta’ ħafna Stati Membri u reġjuni, kif ukoll tal-ktajjen tal-valur tagħhom,” qalet ir-relatur għall-Opinjoni, Isabel Yglesias.

Is-Sinjura Yglesias qalet li l-Opinjoni bniet fuq id-Dikjarazzjoni ta’ Palma, adottata matul il-Presidenza Spanjola tal-Kunsill fit-tieni nofs tal-2023, li kienet iġġenerat kunsens wiesa’ dwar kif jiġi żgurat li s-sostenibbiltà tkun fil-qalba tal-futur tat-turiżmu.

Biex jinkiseb dan, l-istituzzjonijiet Ewropej u l-gvernijiet nazzjonali, reġjonali u lokali jridu jappoġġjaw b’mod attiv is-settur fit-tranżizzjonijiet tiegħu, u fl-istess ħin jiġi żgurat djalogu kontinwu mal-partijiet ikkonċernati rilevanti kollha u jissaħħaħ id-djalogu soċjali.

Filwaqt li l-isforzi ta’ sostenibbiltà fit-turiżmu għamlu ħafna progress, iż-żieda fl-ivvjaġġar wara l-pandemija poġġiet pressjoni fuq ħafna destinazzjonijiet popolari. Din iż-żieda qed tagħmilha aktar diffiċli għar-reġjuni biex jibbilanċjaw it-tkabbir ekonomiku mal-iżvilupp sostenibbli, waqt li jiffaċċjaw in-nuqqas ta’ persunal u spariġġ bejn l-impjiegi disponibbli u l-ħiliet tal-ħaddiema.

Huwa għalhekk li l-KESE qed jappella wkoll għal bidla lejn turiżmu riġenerattiv, u biex dan jiġi inkluż fl-Istrateġija Ewropea għal Turiżmu Sostenibbli, li l-Kummissjoni Ewropea ser tippreżenta fix-xhur li ġejjin.

Għall-kuntrarju tat-turiżmu sostenibbli tradizzjonali, li jiffoka fuq it-tnaqqis tal-ħsara ambjentali, it-turiżmu riġenerattiv għandu l-għan li jirrestawra u jsaħħaħ il-kapital naturali, soċjali u ekonomiku. Dan l-approċċ li jħares ’il quddiem jintegra l-prinċipji tal-ekonomija ċirkolari u jfittex li jħalli impatt pożittiv dejjiemi fuq id-destinazzjonijiet u l-komunitajiet lokali. (ll)

L-UE tinsab f’salib it-toroq kritiku f’dak li jirrigwarda l-iżvilupp tal-IA. Għalkemm huwa minnu li l-kumpaniji fl-Istati Uniti jiddominaw is-suq tal-intelliġenza artifiċjali ġenerattiva (IA ġenerattiva) – li jħaddan 80% tal-investiment privat globali – iċ-Ċina qed tavvanza b’mod rapidu. Biex jidentifika dak li huwa meħtieġ biex jiġi żgurat li l-Ewropa tibqa’ kompetittiva, il-Kumitat Ekonomiku u Soċjali Ewropew (KESE) ippubblika studju ġdid f’kollaborazzjoni maċ-Ċentru għall-Istudji Politiċi Ewropej (CEPS).

L-istudju, li tħejja taħt il-kappa tas-Sezzjoni għas-Suq Uniku, il-Produzzjoni u l-Konsum (INT) tal-KESE, u li ġie diskuss regolarment fl-Osservatorju tas-Suq Uniku Diġitali tal-KESE, jeżamina l-opportunitajiet, l-isfidi u l-miżuri ta’ politika ewlenin meħtieġa biex jissaħħaħ ix-xenarju tal-IA fl-Ewropa.

Rakkomandazzjonijiet ewlenin għall-UE:

• Tingħata spinta lill-investiment fl-IA u l-potenza komputazzjonali – L-Ewropa trid iżżid l-investiment fl-infrastruttura tal-IA biex trawwem l-innovazzjoni.
• Issir enfasi fuq tliet setturi b’potenzjal għoli – L-IA tista’ tixpruna t-tkabbir fl-industrija tal-karozzi, l-enerġija nadifa u l-edukazzjoni.
• Il-promozzjoni tal-IA b’sors miftuħ – L-inkoraġġiment ta’ mudelli tal-IA miftuħa jtejjeb l-aċċessibbiltà u l-kompetizzjoni.
• Integrazzjoni aħjar tal-isforzi tar-R&Ż fl-UE.

It-tisħiħ tal-pożizzjoni tas-soċjetà ċivili fil-governanza tal-IA
L-istudju jenfasizza l-importanza tal-organizzazzjonijiet tas-soċjetà ċivili fit-tfassil tal-politiki u l-governanza tal-IA. Biex jissaħħu l-inklużività u l-adozzjoni etika tal-IA, ir-rapport jirrakkomanda:

• Programmi ta’ litteriżmu fl-IA – Inizjattivi ta’ taħriġ u djalogu soċjali biex tissaħħaħ il-pożizzjoni tal-ħaddiema u l-pubbliku.
• Approċċ intiż li jħaddan l-aspett soċjali – L-iżgurar li l-iżvilupp tal-IA jkun iċċentrat fuq il-bniedem u allinjat mal-ħtiġijiet tas-soċjetà.
• Żieda fil-finanzjament għall-organizzazzjonijiet tas-soċjetà ċivili – Appoġġ għal organizzazzjonijiet mingħajr skop ta’ qligħ li jnaqqsu d-distakk bejn it-teknoloġija tal-IA u l-fehim pubbliku.
• Adozzjoni etika tal-IA – Prijoritizzazzjoni ta’ sistemi tal-IA affidabbli li jallinjaw mal-valuri Ewropej.

L-isfruttar tal-potenzjal tal-KESE fil-politika dwar l-IA
Il-KESE jinsab f’pożizzjoni tajba biex jiffaċilita l-involviment strutturat tal-organizzazzjonijiet tas-soċjetà ċivili fil-politika dwar l-IA. L-istudju jirrakkomanda l-promozzjoni tal-IA b’sors miftuħ u l-promozzjoni tal-innovazzjoni etika permezz tal-akkwist pubbliku u l-iskemi ta’ finanzjament, u li l-KESE jservi bħala ċentru ċentrali biex jikkollabora mal-organizzazzjonijiet tas-soċjetà ċivili u l-komunitajiet b’sors miftuħ u jissensibilizza lill-pubbliku dwar l-impatt tal-IA fuq is-soċjetà.

L-istudju jintroduċi wkoll glossarju unifikat tal-IA biex jiġi stabbilit lingwaġġ komuni, li jiżgura komunikazzjoni effettiva fost dawk li jfasslu l-politika, l-iżviluppaturi u l-utenti – li huwa kruċjali għall-iżvilupp, il-governanza u l-użu responsabbli tal-IA fis-setturi kollha.

Dan l-istudju se jiġi kondiviż ma’ istituzzjonijiet ewlenin tal-UE u huwa mistenni li jikkontribwixxi għall-politiki futuri dwar l-IA. Aqra r-rapport kollu hawnhekk. (vk)