Grupp Ad Hoc dwar il-Konferenza tal-Partijiet

Fi Frar 2022, il-KESE stabbilixxa Grupp Ad Hoc dwar il-Konferenza tal-Partijiet għall-Konvenzjoni Qafas tan-Nazzjonijiet Uniti dwar it-Tibdil fil-Klima (COP) sabiex jiġi żviluppat impenn aktar strateġiku, inklużiv u permanenti tal-KESE fil-proċess tal-UNFCCC.

Il-Grupp Ad Hoc għandu l-għan li jsaħħaħ il-parteċipazzjoni tal-Kumitat fil-laqgħat annwali tal-COP, u li jiżgura kontinwità u impenn strateġiku tal-korpi rilevanti kollha tal-KESE fil-proċess. Il-ħolqien ta’ dan il-Grupp Ad Hoc jirrifletti l-azzjoni klimatika kontinwa tal-KESE matul is-sena u jagħmilha possibbli li nimxu lil hinn mill-proċess tal-UNFCCC b’mezzi addizzjonali u aktar diversi. Billi jissemplifika l-isforzi tal-Kumitat dwar l-azzjoni klimatika, dan il-grupp itejjeb il-kontribut tal-KESE għall-proċess internazzjonali dwar il-governanza klimatika, u b’hekk iwassal għal impatti aktar sinifikanti fuq l-objettiv tan-newtralità klimatika fl-UE sal-2050.

Il-Grupp Ad Hoc huwa magħmul minn membri mill-Grupp ta’ Min Iħaddem, il-Grupp tal-Ħaddiema u l-Grupp tal-Organizzazzjonijiet tas-Soċjetà Ċivili, kif ukoll rappreżentant taż-żgħażagħ.

Ingħata mandat għall-kompiti li ġejjin:

• li jikseb għarfien dwar il-proċess tal-UNFCCC u li jkun aġġornat fir-rigward tal-aspetti ċentrali tan-negozjati; dan jista’ jinkludi taħriġ speċifiku għall-membri tal-Grupp Ad Hoc (u għad-delegazzjoni tal-KESE fil-COP);
• li jiżviluppa pjan ta’ ħidma annwali komprensiv li jiffoka prinċipalment fuq il-laqgħa li jmiss tal-COP, inklużi l-istadji importanti ewlenin (Opinjonijiet, avvenimenti, oħrajn), l-identifikazzjoni tal-partijiet ikkonċernati u l-imsieħba, strateġija ta’ komunikazzjoni, u s-sorsi differenti ta’ informazzjoni (eż. il-pubblikazzjoni tar-rapporti tal-IPCC);
• li jiżgura approċċ transsettorjali strateġiku permezz ta’ kooperazzjoni mill-qrib ma’ gruppi u korpi differenti tal-KESE, u li jiffaċilita l-koordinazzjoni tal-implimentazzjoni tal-attivitajiet tal-COP fil-ħidma tal-korpi tal-KESE u viċi versa (eż. ir-rabta tal-Opinjonijiet rilevanti tal-KESE u ħidma oħra li għaddejja);
• fejn adatt, li jagħti kontribut għall-ħidma preparatorja tad-delegazzjoni tal-KESE fi ħdan il-COP (li l-kompożizzjoni annwali tagħha għandha tkun ibbażata fuq regola ta’ kontinwità ta’ 50 % u għandha tinkludi delegat żagħżugħ addizzjonali);
• li jikkoordina t-tħejjija ta’ riżoluzzjoni tal-COP tal-KESE, allinjata mal-prijoritajiet li jmiss tal-COP u l-proċessi ta’ negozjar tal-UNFCCC, li għandhom jiġu adottati mill-inqas xahrejn qabel il-laqgħa tal-COP;
• li jkollu komunikazzjoni regolari mal-Bureau NAT u l-korpi rilevanti tal-KESE biex tiġi żgurata ċ-ċentralità tal-proċess tal-COP fit-teħid ta’ deċiżjonijiet tal-KESE;
• li jirrapporta lura lill-Bureau tal-KESE mill-inqas tliet darbiet fis-sena.